सरस्वतीका कप्तान दिपेशलाई दुई वर्षको प्रतिबन्ध

काठमाडौं - अखिल नेपाल फुटबल संघ (एन्फा)ले सरस्वती क्लबका कप्तान दिपेश श्रेष्ठलाई दुई वर्षको प्रतिबन्ध लगाएको छ। शहीद स्मारक ए डिभिजन लिग अन्तर्गत सरस्वती युवा क्लब र हिमालयन शेर्पा क्लबबीचको खेलमा प्रतियोगिता नियमावली विपरित कार्य गरेको भन्दै उनलाई प्रतिबन्ध लगाइएको एन्फाले जनाएको छ।

प्रतियोगिताको नियमावली २१(७) विपरित कार्य गरेकोले श्रेष्ठलाई एन्फाले सञ्चालन गर्ने तथा एन्फाको स्वीकृती प्राप्त प्रतियोगितामा दुई वर्षका लागि प्रतिबन्ध लगाइएको हो। साथै उनलाई पचास हजार जरिवानासमेत लगाइएको छ।

उक्त खेलमा सरस्वतीले हिमालयन शेर्पा क्लबलाई ४-३ ले पराजित गरेको थियो। सरस्वती रेलिगेसनमा परेको टोली हो।

एन्फाले हिमालयन शेर्पा क्लबका टिम म्यानेजर विजेन्द्र पुडासैनीलाई पनि जरिवानासहित प्रतिबन्ध लगाएको छ भने हिमालयन शेर्पा क्लबका गोलकिपर प्रशिक्षकलाई कडा चेतावनीसहितको पत्र पठाएको छ। उनलाई एकपटकलाई सुध्रने मौका दिइएको छ। पुडासैनीलाई भने तीस हजार जरिवाना तथा तीन महिना प्रतिबन्धको सजाए सुनाइएको छ।