शनिबार, जेठ १७, २०७७

समाचार

चिलगाडी नउडेपछि पैदलै गाउँ फर्किए साढे तीन सय हुम्ली

1588254590humli.jpg

सुर्खेत- राष्ट्रिय सडक सञ्जालले नछोएको एकमात्र जिल्ला हुम्लामा भौगोलिक विकटता र अभाव त छँदैछ, सधैँ राज्यबाट समेत तिरस्कृत छ।

चरम अभावकाबीच हिउँसँग जुध्दै बाँच्नुपर्ने उनीहरुमध्ये अधिकांश हिउँद लागेपछि नेपालगञ्ज, सुर्खेत, काठमाडौं लगायतका सहरमा झर्छन् । र, गर्मी आउँदै गर्दा गाउँ फर्कन्छन्। उच्च हिमाली भेगमा बस्नेहरुको यो नियमित तालिका नै हो ।

तर यसपालि भने विश्वलाई आतंकित पारिरहेको कोरोना भाइरसले उनीहरु नराम्रोसँग पिरोलिएका छन् । कोरोनाको संक्रमण फैलिन नदिन भन्दै सरकारले लकडाउन गरेपछि उनीहरु मध्य वैशाखसम्म पनि घर फर्कन पाएका छैनन्।

लकडाउनका कारण हुम्ला पुग्ने यातायातको एकमात्रै साधन चिलगाडी (हवाइ जहाज) नउडेपछि उनीहरु सुर्खेत, नेपालगञ्ज र काठमाडौं लगायतका शहरमा अलपत्र परेका छन् । केही भने खेतबारी बाँझै हुनेभयो भन्ने पिरलोले पैदल हिंडेरै गाउँ फर्किन थालेका छन् ।

‘ठाउँठाउँमा बाटो अबरुद्ध थियो, होटेलहरु बन्द थिए, बल्लतल्ल सास जोगिएको छ,’ सुर्खेतबाट भोकभोकै गाउँ फर्किन लागेका चंखेली गाउँपालिका ४ का धीरबहादुर शाहीले जुम्ला पुगेपछि भने ।

तीन दिन अघिमात्रै सुर्खेतबाट हुम्ला हिडेका ३५३ जना जुम्लाको कोठिज्यूला हुँदै गाउँतर्फ लागिसकेका छन्। हुम्लाको चंखेली, अदानचुली, खार्पुनाथ र सर्केगाड गाउँपालिकाका ३५३ जनालाई जुम्लाको गोठिज्युलाका स्थानीय युवाले खाना खुवाएर पठाएको जुम्लाका पत्रकार उपेन्द्र न्यौपानेले जानकारी दिए ।

जुम्लाबाट  अघि बढेका उनीहरुलाई मुगुमा स्थानीय पत्रकारले चाउचार र विष्कुट ख्वाएका छन् । नेपाल पत्रकार महासंघ मुगुका अध्यक्ष निपेन्द्र बहादुर मल्लले प्रतिव्यक्ति एक पोका चाउचाउ, एक पोका बिस्कुट र एक बोतल पानी सहयोग गरेको पत्रकार राजन रावलले जानकारी दिए ।

सुर्खेतबाट पैदल हुम्ला जाँदै गरेकालाई जुम्लाका युवाले खाना खुवाएर पठाएका छन् ।

डेढ लाख सहयोग

यस्तै नेपालगञ्जमा अपलत्र परेका करिव ८०० सयजना हुम्लाका विद्यार्थीको उद्दारमा सहयोग गर्न चंखेली– ५ का हुम्लाका धीरज तामाङले डेढलाख रुपैयाँ सहयोग गरेका छन्।

खानेपानी तथा सरसफाइ डिभिजन कार्यालय बाँकेमा कार्यरत ओभरसियर तामाङले बुटवल र काठमाडौंबाट नेपालगञ्ज पुगेका विद्यार्थीको खाना र बसभाडाका लागि डेढलाख रुपैयाँ सहयोग गरेको हुम्लाका अर्का पत्रकार नरजंग तामाङले जानकारी दिए ।

यसैबीच हुम्लाबाट प्रतिनिधिसभा सदस्य छक्कबहादुर लामाले शुक्रबार र शनिबारका लागि हुम्लामा जहाज उडाउनको अनुमति पाइएको बताएका छन् । यिमध्ये एउटा उडान सुर्खेत र अर्को नेपालगञ्जबाट हुनेछ ।

प्रतिक्रिया दिनुहोस्