इरानमा कोरोनाको मृत्युदर उच्च

कोरोना भाइरस (कोभिड–१९)को संक्रमणका कारण अहिलेसम्मकै उच्च मृत्युदर इरानमा भएको छ । इरानमा कोरोना संक्रमितमध्ये २५ प्रतिशतको मृत्यु भएको पाइएको छ ।

इरानमा कोरोनाको कारण मृत्यु हुनेको संख्या १२ पुगेको छ । जबकी जम्मा ४७ जनामा संक्रमण भएको पुष्टि भएको छ । यो कोरोनाबाट मृत्यु हुने अहिलेसम्मकै उच्च मृत्युदर हो ।

गत बुधबारबाट संक्रमण देखिन सुरु गरेको इरानले त्यसअघिसम्म आफ्नो देश कोरोना भाइरसबाट मुक्त रहेको बताएको थियो । संक्रमण सुरु भएको केही दिनमै सबैभन्दा बढी क्षति बेहोने दोस्रो देश इरान बनेको छ ।

सबैभन्दा धेरै क्षति बेहोने पहिलो देश चीन भए पनि कोरोना संक्रमितको तुलनामा मृत्युदर भने कम छ । चीनमा कोरोना संक्रमितको मृत्युदर ३.३५ प्रतिशत छ ।

चीनमा कोरोना संक्रमितको संख्या ७७ हजार ३ सय ४५ छ भने मृत्यु हुनेको संख्या २ हजार ५ सय ९३ रहेको छ । कोरोना संक्रमणपश्चात् चीनमा निको भएर घर फर्कनेको संख्या २४ हजार ९ सय ४२ अर्थात् ३२.२४ प्रतिशत छ ।

चीनबाहिर हालसम्म इरानको मृत्यु संख्या नै सबैभन्दा धेरै हो । इरानपछि दक्षिण कोरियामा हालसम्म ८ संक्रमितको मृत्यु पुष्टि भएको छ ।

कोरियामा हालसम्म ८ सय ३३ जना संक्रमित फेला परेका छन् । कोरियन सरकारले देशमा ‘रेड अलर्ट’ जारी गरेको छ । कोरियामा कोरोना संक्रमणका कारण मृत्यु हुनेको मृत्युदर ०.९६ प्रतिशत छ ।

इरानमा पहिलो संक्रमण देखिएको छैटौं दिनमै १२ जनाको मृत्यु भएको हो ।

(एजेन्सीहरु)