ओलीको जन्मदिन मनाउन तेह्रथुममा सार्वजनिक बिदा

तेह्रथुम- प्रधानमन्त्री केपी शर्मा ओलीले आफ्नो ६९ औं जन्मोत्सव जन्मघरमा मनाउने भएका छन्।

त्यसका लागि उनी आइतबार बिहानै काठमाडाैँबाट प्रस्थान गरेका छन्। प्रधानमन्त्री ओली जन्मदिन मनाउन आउने भएपछि तेह्रथुमको आठराई गाउँपालिकामा आज (आइतबार) सार्वजनिक बिदा दिइएको छ।

गाउँपालिका कार्यालयले प्रधानमन्त्री ओली विभिन्न विकास निर्माणका कामको शिलान्यास गर्न गाउँपालिका आउँने भएकाले स्थानीय बिदा दिने निर्णय गरिएको जनाएको छ।

प्रधानमन्त्रीको स्वागतका लागि गाउँपालिकाले शिक्षकहरुलाई तोकिएको पोसाकमा उपस्थित हुन निर्देशन जारी गरेको छ भने विद्यार्थीलाई पनि स्वागतमा खटाइएको छ।

ओलीले जन्मदिनको अवसरमा दुई हजार विद्यार्थीलाई आफ्नो तस्बिर र हस्ताक्षरसहितको डायरी र कलम तथा दुई सय वृद्धवृद्धालाई न्यानो कपडा वितरण गर्ने कार्यक्रम छ।

ओलीले आजै जन्मदिनको अवसर पारेर छातेढुङ्गाको सुकेपोखरी, आफ्नो जन्मघर हुँदै ताप्लेजुङ्गको ढुङ्गेसाँघुमा रहेको मदन भण्डारीको जन्मघरसम्म जोड्ने मोटरबाटोको शिलान्यास गर्ने कार्यक्रम छ। यस्तै जन्मघरमा हुने कार्यक्रममा उनले नेपाल बैंकको शाखा कार्यालय उद्घाटन गर्ने भएका छन्।