'कम्युनिस्टले आफूले आफैंलाई सिद्ध्याउँछन्'

भक्तपुर- नेपाल कम्युनिस्ट पार्टी (नेकपा)का अध्यक्ष पुष्पकमल दाहाल प्रचण्डले कम्युनिस्ट नेताहरुले व्यवहारमा पनि आदर्श देखाउन आवश्यक रहेको बताएका छन्।

शुक्रबार भक्तपुरमा आयोजित भवन शिलान्यास कार्यक्रमलाई सम्बोधन गर्दै प्रचण्डले केही कम्युनिस्ट नेताले आफैंले आफैंलाई सिद्धाएको बताए। प्रचण्डले भने, ‘कम्युनिस्ट पार्टीको नेतृत्व आफ्ना आदर्श तथा उद्देश्य र वैचारिक निष्ठाबाट विचलित भएपछि पुँजीपति, सेना, बन्दुक केही पनि चाहिँदो रहेनछ । आफैंले आफैंलाई सिद्ध्याउने रहेछन्।’

उनले कम्युनिस्टहरु सत्तामा नहुँदा, क्रान्तिमा हुँदा त्याग गर्न सक्ने तपस्या गर्न सक्ने, जनता जहाँ बस्छन्, त्यहाँ बस्ने सक्ने, जनताले जे खान्छन् त्यही खान सक्ने, तर सत्ता प्राप्त गरेपछि त्यो आदर्शबाट विचलित हुने गरेको बताए। प्रचण्डले कम्युनिस्ट आदर्शको राजनीतिलाई फेरि एकपटक स्थापित गर्नुपर्ने बताए।

‘हिजो मृत्युलाई सामना गरेर, जेलनेल, यातना र भयलाई समेत वास्ता नगरेर जनताको मन जित्ने, तर शासन हातमा आएपछि अर्कैअर्कै। यो सबैभन्दा बढी २० औं शताब्दीमा देखिएको थियो। कम्युनिस्ट पार्टीका नेताहरु आदर्शबाट च्यूत भएपछि, शासनबाट बाहिरिन त्यहाँ पूँजीपति चाहिन्न,बन्दुक पनि चाहिन्न। आफैंले आफैंलाई सिध्याउने रहेछन्,’ अध्यक्ष प्रचण्डले भने।