गोकुलले कमिसनको रेकर्ड तोडे : सुन्दरमणि दीक्षित

काठमाडौं– नागरिक समाजका अगुवा डा. सुन्दरमणि दीक्षितले सञ्चारमन्त्री गोकुल बाँस्कोटाले कमिसनको रेकर्ड तोडेको टिप्पणी गरेका छन्। बिहीबार काठमाडौंमा आयोजित एक कार्यक्रममा दीक्षितले भने, ‘योभन्दा पहिले ५० करोडसम्मको कमिसनको कुरा सार्वजनिक भएको थियो। ७० करोड पुर्‍याएर कमिसनको रेकर्ड ब्रेक गरेका छन् बाँस्कोटाले।’

दीक्षितले थपे, ‘गोकुल बाँस्कोटाले सधैं मञ्चबाट मनलाग्दी बोलेर कसैलाई पनि बाँकी राख्नु हुन्नथ्यो । बाँस्कोटाजीले सबै मानिसहरु खराब, आफूमात्रै असल भनेर जुन देखाउनु हुन्थ्यो तर, आज अडियो सुन्दा सबैभन्दा खराब त उहाँ नै रैछ।’

दीक्षितले बाँस्कोटालाई राजीनामा दिँदैमा छुट दिन नहुने भन्दै कडा कारवाही गर्न प्रधानमन्त्री केपी शर्मा ओलीलाई सुझाव दिए। उनले भने, ‘प्रधानमन्त्रीजीले आफू पनि भ्रष्टाचार गर्दिँन, अरुलाई पनि छोड्दिन भन्दै आउनुभएको छ, अब थाहा हुन्छ, बाँस्कोटालाई छुट दिनुहुन्छ कि कारवाही गर्नुहुन्छ। ओलीजी अग्नी परीक्षामा हुनुहुन्छ।’

ओली र बाँस्कोटाको सम्बन्धबारे चर्चा गर्दै दीक्षितले भने, ‘बाँस्कोटा ओलीजीको धेरै नजिकका व्यक्ति हुन्, राजीनामा दिएपछि छुट दिन्छन् वा एक्सन लिन्छन् हेर्न बाँकी छन्। छुट दिए भने मेरो नजरबाट गिर्नुहुन्छ।’