बुधबार, जेठ १४, २०७७

समाचार

कैलालीमा निजी स्कुल सञ्चालक मृत भेटिए

158771315594718336_943373409441784_22554.jpg

कैलालीको गौरीगंगामा एक निजी स्कुलका सञ्चालक मृत भेटिएका छन्। गौरीगंगा नगरपालिकामा रहेको बिहानी क्षितिज बोर्डिङ स्कुलका सञ्चालक तथा प्रिन्सिपल ४० वर्षीय कृष्णप्रसाद भुषाल मृत भेटिएका हुन्।

प्रहरीका अनुसार भुषाल पहलवानपुर बजारबाट करिब एक किलोमिटर पश्चिम पूर्वपश्चिम राजमार्गमै मृत फेला परेका हुन्।

निजी विद्यालयहरुको संगठन एनप्याब्सनका केन्द्रीय उपाध्यक्षसमेत रहेका भुषालको आँखा, मुख र घँुडामा चोट देखिएको कैलाली प्रहरीका प्रवक्ता प्रहरी नायव उपरीक्षक दक्ष बस्नेतले जानकारी दिए।

प्रहरीले भुषालसँगै बसेर मदिरा पिउने एक जना र होटल मालिकलाई सोधपुछका लागि नियन्त्रणमा लिएको जनाएको छ। उनीहरुको परिचय खुलाइएको छैन।

भुषाल साइकलमा पहलवानपुरबाट घरतर्फ गइरहेको बुझिएको छ। प्रहरीले घटनाबारे अनुसन्धान भैरहेको जनाएको छ।

भुषालको शव पोस्टमार्टमका लागि सेती प्रादेशिक अस्पताल धनगढी पठाइएको बस्नेतले जानकारी दिए।

प्रतिक्रिया दिनुहोस्