काठमाडौं- हालैमात्र प्रतिनिधिसभाको उपसभामुखबाट राजीनामा दिएकी शिवमाया तुम्वाहाङ्फे कानुन, न्याय तथा संसदीय मामिलामन्त्री बन्ने भएकी छन्। उनलाई आजै मन्त्रीका रुपमा शपथ ग्रहण गराउने तयारी छ।
राष्ट्रपति कार्यालयका प्रवक्ता हरिप्रसाद दाहालमा अनुसार तुम्वाहाङ्फेको शपथ ग्रहण कार्यक्रम शीतलनिवासमा अपरान्ह साढे ३ बजे राखिएको छ।
यौनकाण्डमा मुछिएर गत असोजमा कृष्णबहादुर महराले सभामुखबाट राजीनामा दिएपछि उनले सभामुखमा दाबी गरेकी थिइन्। तर, नेकपा सचिवालयले अग्नि सापकोटालाई सभामुख बनाउने निर्णय गर्दै उनको राजीनामा मागेको थियो।
सभामुखमा सापकोटा निर्वाचित भए भने उपसभामुख पद अहिले पनि खाली छ। सभामुख र उपसभामुख फरक फरक पार्टीबाट हुनुपर्ने संवैधानिक व्यवस्थाका कारण तुम्वाहाङ्फेले राजीनामा दिनुपरेको थियाे।