काठमाडौं– नेपाल–अस्ट्रेलिया सम्बन्ध ६०औं वर्षमा प्रवेश गरेको छ। यस अवसरमा दुवै देशका परराष्ट्रमन्त्रीले पारस्परिक सम्बन्ध सुमधुर रहेको भन्दै एकआपसमा बधाइ तथा शुभकामना सन्देश आदानप्रदान गरेका छन्।
सन्देशमा परराष्ट्रमन्त्री प्रदीपकुमार ज्ञवाली र अस्ट्रेलियाका विदेशमन्त्री मारिसे प्यानेले पारस्परिक विश्वास, समझदारी र सहयोगमा आधारित दुवै देश र जनाताबीचको सम्बन्धलाई अझ सुदृढ तुल्याउने प्रतिबद्धता व्यक्त गरेको परराष्ट्र मन्त्रालयले जनाएको छ।
द्विपक्षीय सम्बन्ध स्थापनाको ६०औँ वर्ष प्रवेशका अवसरमा नेपालका लागि अस्ट्रेलियाका राजदूत पिटर बडले शनिबार साँझ राजधानीमा स्वागत समारोह आयोजना गरेका थिए।
कार्यक्रममा मन्त्रिपरिषद्का सदस्य, प्रधानमन्त्रीका सल्लाहकार, कूटनीतिक नियोगका प्रमुख, नेपाल सरकारका उच्च पदस्थ अधिकारीलगायत नेपाली समाजका प्रतिष्ठित व्यक्तिहरूलाई आमन्त्रण गरिएको यहाँस्थित अस्ट्रेलियाली राजदूतावासले जनाएको छ।