सेनाकाे पुरानो हेलिकोप्टर इन्जिनियरिङ क्याम्पसलाई हस्तान्तरण

नेपाली- सेनाले आफ्नो एउटा पुरानो हेलिकोप्टर नेपाल इन्जिनियरिङ क्याम्पस पुल्चोकलाई दिएको छ।

बुधबार एक समारोहमा सेनाका सम्भाररथी उपरथी प्रभुराम शर्माले नेपाली सेनाको सर्भिस लाईफ पुरा भएको ‘अलुएटी थर्ड’ हेलिकोप्टर त्रिविको इन्जिनियरिङ क्याम्पस पुल्चोकलाई हस्तान्तरण गरेका हुन्।

क्याम्पसका विद्यार्थीहरुलाई अध्ययनका लागि भन्दै सेनाले हेलिकोप्टर हस्तान्तरण गरेको हो।

हेलिकोप्टरसँगै त्यससँग सम्बन्धित पार्टपूर्जा हस्तान्तरण गरिएको छ। उक्त हेलिकोप्टरका पार्टपूर्जाहरु क्याम्पसका विद्यार्थीहरुको व्यवहारिक शिक्षाका लागि लाभदायक हुने विश्वास लिइएको छ।

उक्त हेलिकोप्टर नेपाली सेनाले २०४७ साल जेठ २३ गतेदेखि प्रयोग गर्दै आएको थियो। हेलिकोप्टरले गत २०७५ को चैत २ गते अन्तिम उडान गरेको थियो।

हेलिकोप्टरले ४ हजार १२१ घण्टा उडान गरेको छ।