जनकपुरधाम– प्रदेश २ को प्रदेशसभा सचिवालयले प्रदेश सांसदहरुलाई ल्यापटप बाँड्ने तयारी गरेको छ । प्रत्येक प्रदेशसभा सांसदलाई एक लाख रुपैयाँभन्दा बढी मूल्यको ल्यापटप वितरण गर्ने तयारी प्रदेशसभा सचिवालयले गरेको हो ।
प्रदेश सांसदहरुलाई दिइने ल्यापटप प्रदेशसभा सचिवालय पुगिसकेको छ । प्रदेश २ को प्रदेशसभामा १०७ सांसद छन् । सबै सांसदसहित कार्यालय प्रयोजनको लागि प्रदेशसभा सचिवालयले ११८ वटा ल्यापटप खरिद गरेको छ ।
सचिवालयले १ करोड ५९ लाख रुपैयाँ खर्चेर ल्यापटप खरिद गरेको हो। यस हिसाबले प्रतिल्यापटप १ लाख ३४ हजार ७ सय ४५ रुपैयाँ पर्न जान्छ ।
ल्यापटप खरिद गर्न सचिवालयले गत आर्थिक वर्षमै टेन्डर निकालेर सम्झौता गरेपनि चालू आर्थिक वर्षमा मात्र प्रदेश सांसदहरुलाई वितरण गर्ने तयारी गरेको बताइएको छ ।
प्रदेशसभा सचिावलयले गत आर्थिक वर्षमै प्रदेश सांसदहरुलाई ल्यापटप वितरण गर्ने कार्यक्रमअन्तर्गत टेन्डर प्रकाशन गरेको थियो । तर टेन्डर परेको काठमाण्डुस्थित म्याक्स इन्टरनेशनलले ल्यापटप उपलब्ध गराउन नसकेपछि ढिलोगरी वितरण गर्न लागिएको हो ।
ल्यापटपमा केही सफ्टवेयर अपडेट गर्नुपर्ने भएको र यो काम सकिएलगत्तै प्रदेश सांसदहरुलाई वितरण गरिने प्रदेशसभा सचिवालयले जनाएको छ ।
प्रदेशसभा सचिवालयका सचिव रञ्जीत यादवले डेल कम्पनीको ल्याटिच्युड ३३९० मोडलको ल्यापटप प्रदेश सांसदहरुलाई वितरण गरिने जानकारी दिए । ‘सर्भरसहितको सेवा उपलब्ध रहेको ल्यापटपमा सफ्टवेयर अपडेट गर्ने काम भइरहेको छ, यो सकिएलगत्तै माननीयज्यूहरुलाई वितरण हुन्छ,’ सचिव यादवले भने ।
१०७ प्रदेशसभा सदस्यसहित कार्यालय प्रयोजनको लागिसमेत गरेर ११८ वटा ल्यापटप खरिद गरिएको उनले बताए । गत आर्थिक वर्षमै समावेश गरिएको कार्यक्रम भए पनि कार्यक्रम बहुवर्षीय शीर्षकमा समावेश भएकोले ल्यापटप बाँड्न कुनै समस्या नरहेको उनले दाबी गरे ।
प्रदेशसभालाई ‘पेपरलेस’ बनाउने योजनाअनुरुप प्रदेश सांसदहरुलाई ल्यापटप वितरण गर्न लागिएको सचिवालयले जनाएको छ । विधेयक, प्रदेशसभाको कार्यसूचीलगायत सामग्री कागजमा प्रिन्ट गरेर वितरण गर्दा खर्च बढेकोले खर्च न्यूनीकरण गर्न ल्यापटप वितरण गर्न लागिएको सचिवालयको भनाइ छ ।
ल्यापटप वितरण गरेर सचिवालयले प्रदेशसभालाई ‘पेपरलेस’ बनाउने तयारी गरे पनि सबै प्रदेशसभा सदस्यहरुका लागि यसको प्रयोग भने सहज देखिएको छैन । कतिपय सांसदहरु ल्यापटप र इन्टरनेट प्रयोगबारे जानकार छैनन् । त्यस्ता सांसदहरुलाई तिनका स्वकीय सचिवले सहयोग गर्ने सचिव यादवको भनाइ छ ।