चिकित्सक संघको अध्यक्षमा डा. कार्की निर्वाचित हुने पक्का

काठमाडौं- नेपाल चिकित्सक संघको अध्यक्षमा डा. लोचन कार्की निर्वाचित हुने पक्का भएको छ।

संघको २८ औं कार्यकारिणी समितिको निर्वाचन अन्तर्गत जारी मतगणनामा डा. कार्कीले ३ हजार १ सय ९८ मत प्राप्त गरेका छन्। निर्वाचनमा जम्मा जम्मा ६ हजार १ सय ५२ मत खसेको थियो।

जसमध्ये ४ हजार ७ सय ८५ मत गणना भएको छ। डा. कार्कीका प्रतिद्वन्द्वी डा.पुष्पमणि खरालले जम्मा १ हजार ५ सय ३५ मत प्राप्त गरेका छन्।

त्यस्तै संघको उपाध्यक्ष डा. अनिलविक्रम कार्की जितको नजिक पुगेका छन्। उनले पनि आधाभन्दा बढी अर्थात् ३ हजार ८५ मत प्राप्त गरेका छन् भने उनका प्रतिद्वन्द्वी डा. रञ्जीतकुमार झाले १ हजार ५ सय २४ मत प्राप्त गरेका छन्।

कार्की लोकतान्त्रिक प्यानलका अध्यक्षका उम्मेदवार हुन्। डा. कार्की लगायत सबै पदाधिकारी र अधिकांश सदस्यहरु उनकै प्यानलबाट अग्रता लिइरहेका छन्।

नयाँ नेतृत्वले आगामी फागुन १५ गतेदेखि पोखरामा हुने राष्ट्रिय सम्मेलनबाट कार्यभार सम्हाल्ने छ।