काठमाडौं– मस्यौदा तयार गर्दादेखि नै विवादित बनेको मिडिया काउन्सिल विधेयक संघीय संसदको राष्ट्रिय सभाबाट पारित गर्ने तयारी भएको छ।
आज (बिहीबार) दिउँसो १ बजे बस्ने राष्ट्रिय सभाको बैठकमा सञ्चार तथा सूचना प्रविधिमन्त्री गोकुल प्रसाद बाँस्कोटाले ‘नेपाल मिडिया काउन्सिल विधेयक, २०७५ माथि छलफल गरियोस्’ भनी प्रस्ताव पेस गर्ने कार्यसूची छ।
विधेयकमाथि आज नै छलफल हुनेछ र त्यसपछि मन्त्री बाँस्कोटाले उक्त विधेयक पारित गर्ने प्रस्ताव लग्नेछन्। प्रक्रियाअनुसार उक्त विधेयक आजै पारित हुन सक्नेछ। मिडिया काउन्सिल विधेयक लामो समयदेखि विवादित रहँदै आएको छ।
केही प्रावधानहरु संशोधन गरेर संसदीय समितिबाट विधेयक पारित भइसकेको छ। राष्ट्रियसभाबाट पारित भएको खण्डमा मिडिया काउन्सिल विधेयक प्रतिनिधिसभामा पेस हुनेछ।
प्रतिनिधिसभाको बैठक पनि आज दिउँसो १ बजेका लागि बोलाइएको छ। प्रतिनिधिसभाको बैठकमा विभिन्न मन्त्रीहरुले विधेयक पेश गर्ने कार्यसूची रहेको छ।