काठमाडौं- नेपाल-भारत मैत्रीपूर्ण फुटबल पराजय व्यहोरेपछि नेपाली टोलीका प्रशिक्षक अब्दुल्लाह अलमुताइरीले हारसँग डराउन नहुने बताएका छन्। नेपाली खेलाडीले राम्रो प्रदर्शन गरेको बताएका उनले खेलबाट आफू खुशी भएको प्रतिक्रिया दिएका हुन्।
'हामीले राम्रो खेल्यौँ। खेलमा नियन्त्रण बनायौँ। तर, फिनिसिङमा कमजोरी रह्यो,' अलमुताइरीले भने, 'हारबाट डराउनु हुँदैन।'
खेलमा नेपाल २-१ गोलले पराजित भएको थियो। नेपालले खेलमा तीन वटा राम्रा अवसर पाएपनि सदुपयोग गर्न चुकेको थियो।
बराबरीमा सकिएको पहिलो हाफमा कुनै पनि टिमबाट गोल हुन सकेको थिएन। तर दोस्रो हाफमा भारतले गोल हान्दै अग्रता बनाएको थियो। त्यसपछि नेपालले पनि एक गोल फर्काएपनि रेफ्रीले समय सकिएको सिटी फुक्नुअघि भारतले २ गोल हानिसकेको थियो।
आइतबार दोस्रो मैत्रीपूर्ण खेल भएको हो। यसअघि बिहीबारको पहिलो मैत्रीपूर्ण खेलमा १-१ को बराबरी भएको थियो।