वडाध्यक्ष हत्याको छानविन गर्न सिआइवी टोली अछाममा, शव अझै उठेन

अछाम- मंगलबार बिहान मृत भेटिएका अछामको पन्चदेवल नगरपालिका–२ का वडाध्यक्ष पदमबहादुर धामीको शव अझै उठेको छैन ।

आफन्त र स्थानीयले वडाध्यक्षको हत्या नै भएकाले निष्पक्ष छानविन गर्न माग गर्दै शव उठाउन नदिएका हुन् । उनीहरुले घटनाको छानविनको माग गर्दै बुधबार अछाम बजारसमेत बन्द गरेका छन् ।

स्थानीयले बुधबार बिहानैदेखि बजारमा यातायातका साधन र पसलहरु बन्द गराएको जिल्ला प्रहरी कार्यालय अछामका इन्स्पेक्टर रमेशदत्त अवस्थीले नेपाल समयलाई जानकारी दिए ।

अहिलेसम्म आफन्तले शव बुझेका छैनन् । प्रहरीले सत्यतथ्य छानविन नगरेसम्म शव नबुझ्ने उनीहरुले अडान लिएका छन् । शव अहिले पनि घटनास्थलमै रहेको इन्स्पेक्टर अवस्थीले बताए ।

यसैबीच घटनाको विषयमा छानविन गर्न काठमाडौंबाट केन्द्रीय अनुसन्धान व्युरो (सिआइवी) को टोली घटनास्थलमा पुगेको छ । इन्स्पेक्टर सन्तोष श्रेष्ठको नेतृत्वमा ५ जनाको टोली बुधबार (आज) बिहान घटनास्थलमा पुगेको हो । टोलीले बिहानैबाट अनुसन्धान सुरु गरेको छ ।

यस्तै स्थानीयको माग बमोजिम धनगढीबाट अनुसन्धानका लागि तालिम प्राप्त कुकुरसमेत झिकाइएको छ । कुकुरसहितको टोली पनि बिहानै घटनास्थलमा पुगेको इन्स्पेक्टर अवस्थीले नेपाल समयलाई बताए ।

उनले भने, 'तीनवटा टोलीले एकै साथ अनुसन्धान सुरु गरेका छौं । चाँडै सत्य तथ्य पत्ता लाग्ने छ ।' उनका अनुसार प्रहरीले मोवाइलको कल डिटेलमार्फत अनुसन्धानको सुरुवात गरेको छ ।

पन्चदेवल नगरपालिका–२ का वडाध्यक्ष धामी मंगलबार बिहान घरभन्दा करिब ५ सय मिटर पर मृत अवस्थामा भेटिएका थिए। गाईभैंसी बाँध्ने गोठभित्रै रक्ताम्मे अवस्थामा उनको शव भेटिएको थियो ।

मंगलबार बिहान आफन्तले घरमा नभेटेपछि वडाध्यक्ष धामीको खोजी गरेका थिए । खोजीका क्रममा उनको शव गोठमा भेटेका थिए । धामी नेपाली कांग्रेसका तर्फबाट वडाध्यक्षमा निर्वाचित भएका थिए।