८ महिना पछि सर्‍याे धनगढी प्रिमियर लिग

काठमाडौं– धनगढीमा वार्षिक रुपमा आयोजना हुने धनगढी प्रिमियर लिगको आयोजना मिति सारिएको छ। विगतका सिजनमा १५ बाट १७ फेब्रुअरीसम्म आयोजना हुने प्रतियोगिताको मिति यस वर्ष भने अक्टोबरमा सारिएको हो।

प्रतियोगिताको आयोजक धनगढी क्रिकेट एकेडेमीले मंगलबार प्रेस विज्ञप्ति निकाल्दै प्रतियोगिता सारेको जानकारी गराएको हो। उसले व्यस्त नेपाली क्रिकेट प्रतियोगिताका कारण यो लिग सार्नुपरेको बताएको छ।

विज्ञप्तिमा भनिएको छ, ‘हामीले चौथो संस्करण यही फेब्रुअरी १५ देखि २७ सम्म गर्ने यसअघि नै घोषणा गरिसकेका थियौं । तर, नेपाली राष्ट्रिय क्रिकेट टोलीको व्यस्त अन्तर्राष्ट्रिय क्यालेन्डरका कारण हामी प्रतियोगिताको आयोजना मिति सार्न बाध्य छौं । अब चौथो संस्करण २०२० अक्टोम्बर २४ देखि नोभेम्बर ७ सम्म आयोजना हुने जानकारी गराउँदछौं ।’

फागुनमा हुँदै आएको प्रतियोगिता अब कात्तिक पहिलो हप्ताबाट सुरु हुने भएको छ। धनगढी प्रिमियर लिगले तीन सिजनको प्रतियोगिता गराइसकेको छ।