प्रदेशसभाले वार्षिकोत्सव मनाइरहँदा बाहिर उपभोक्ता समितिको धर्ना

जनकपुरधाम– प्रदेश २, प्रदेशसभाले दोस्रो वार्षिकोत्सव मनाइरहँदा उपभोक्ता समितिका सदस्यहरु भने प्रदेशसभा भवन बाहिर धर्नामा छन्।

प्रदेश सरकारले पछिल्लो आर्थिक वर्षमा सम्पन्न योजनाहरुको भुक्तानी नगरेको भन्दै उपभोक्ताले प्रदेशसभा भवन बाहिर धर्ना दिएका हुन्।

सरकारसँग भएको सम्झौताअनुसार निर्माण कार्य सम्पन्न भइसक्दा पनि भुक्तानी नभएको भन्दै उपभोक्ताहरु केही सातादेखि आन्दोलनमा छन्।

सरकारले बक्यौता रकम भुक्तानी नगरेपछि ठूलो समस्यामा परेको उपभोक्ता रोशनसिंह राणाले बताए। भुक्तानीको सम्बन्धमा मुख्यमन्त्रीदेखि सम्बन्धित मन्त्रीहरुले पटक पटक झुटो आश्वासनमात्र दिनेगरेको उनको गुनासो छ।

“सम्पन्न भइसकेको कामको रकम भुक्तानी गर्न नसक्ने व्यक्तिले नैतिकताका आधारमा पनि सरकार छोड्नुपर्छ,” राणाले भने।
गत आर्थिक वर्षमा सम्पन्न भएका ८४२ योजनाबाट करिब ८६ करोड रुपैयाँ भुक्तानी हुन बाँकी छ।