वडाध्यक्षको शव उठाएनन् आफन्तले, धनगढीबाट कुकुरसहित प्रहरी टोली जाँदै

काठमाडौं– अछाममा वडाध्यक्ष मृत भेटिएको घटनाबारे अनुसन्धानका लागि प्रहरीले तालिम प्राप्त कुकुरसहितको टोली पठाएको छ।

संघीय प्रहरी इकाई कार्यालय धनगढीले अनुसन्धानका लागि तालिम प्राप्त कुकुरसहितको टोली अछाम पठाएको हो। सुदूरपश्चिम प्रदेशका निमित्त प्रहरी प्रमुख प्रहरी वरिष्ठ उपरीक्षक देववहादुर बोगटीले घटनाको अनुसन्धानका लागि तालिमप्राप्त कुकुर सहितको टोली पठाइसकिएको जानकारी दिए।

धनगढीबाट घटनास्थल विनायक पुग्न गाडीमा करिव १० घण्टा लाग्छ। टोली आज बेलुकीसम्ममा घटनास्थल पुग्छ।

पञ्चदेवल विनायक नगरपालिका–२ का वडाध्यक्ष पदमबहादुर धामीको शव भैँसी बाँध्ने छानामा मंगलबार बिहान भेटिएको हो। नगर प्रमुख देवराज देवकोटाले घटनाको अनुसन्धानका लागि प्रहरीको केन्द्रीय अनुसन्धान व्यूरोको टोली पठाउन पहल भइरहेको बताए।

धामीको शव रक्ताम्य अवस्थामा रहेकाले उनको हत्या भएको आशंका प्रहरीले गरेको छ। आफन्तले घटनाबारे सत्यतथ्य अनुसन्धान नहुँदासम्म शव उठाउन नदिने बताएका छन्।

३८ वर्षीय धामी शिक्षक पेशाबाट राजीनामा गरी नेपाली कांग्रेसका तर्फबाट वडाध्यक्षमा निर्वाचित भएका थिए।