डर्टमुन्डको सानदार जित

डर्टमुन्ड– बुन्डेस लिगाअन्तर्गत शनिबार राति सम्पन्न खेलमा बोरुसिया डर्टमुन्डले सानदार जित निकालेको छ।

उसले घरेलु मैदानमा युनियन बर्लिनलाई ५–० ले हराएको हो।

डर्टमुन्डको बेस्ट फलेन रंगशालामा भएको खेलमा एर्लिन ब्रट हालान्डले दुई गोल गरे। उनले खेलको १८ औं र ७६ औं मिनेटमा गोल गरेका थिए।

डर्टमुन्डलाई सुरुवाती अग्रता दिन जाडोन सान्चेले पहिलो गोल गरे। उनले खेलको १३ औं मिनेटमा गोल गर्दै टोलीलाई अग्रता दिलाएका थिए।

त्यस्तै, मार्को रिउस र एलेक्स विस्टेलले पनि गोल गरेर जितलाई थप सानदार बनाए। रिउसले ६८ मिनेटमा गोल गरे भने विस्टेलले ७० मिनेटमा गोल गरेका थिए।

जितसँगै डर्टमुन्डले अंक तालिकामा ३९ अंक भएको छ। २० खेलमा ११ जित र ६ बराबरी खेल्दै डर्टमुन्ड अंकतालिकाको तेस्रो स्थानमा छ।

बायर्नको अग्रता कायमै

शनिबारै सम्पन्न अर्को खेलमा साविक विजेता बार्यन म्युनिखले मेन्ज फाइभलाई हराउँदै शीर्ष स्थानको पकडलाई बलियो बनाएको छ।

कोफाका एरियाना स्टेडियममा सम्पन्न खेलमा जितका लागि रोवर्ट लेवान्डोस्की, थोमस मुलर र थियागो अल्कानताराले एक–एक गोल गरे।

लेवान्डोस्की, मुलर र थियागोले क्रमशः ८ औं, १४ औं र २६ औं मिनेटमा गोल गरेका थिए।

उता सेन्ट जस्टेले खेलको ४५ औं मिनेटमा एक गोल फर्काएका थिए।

खेलको दोस्रो हाफमा दुवै टोलीका तर्फबाट गोल हुन नसक्दा ३–१ को गोलअन्तरमा बायर्नले जित निकालेको थियो।

बायर्नको २० खेलमा १३ जित र तीन बराबरीका साथ ४२ अंक छ। बायर्न दोस्रो स्थानमा रहेको लेप्जिङभन्दा एक अंकले अगाडि छ।