काठमाडौं - चीन सरकारले बुहान क्षेत्रमा रहेका नेपाली विद्यार्थीको जीवन र स्वास्थ्य उपचारको सुनिश्चितता गरेको जनाएको छ। काठमाडौं स्थिति चिनियाँ दूतावासले शनिबार एक विज्ञप्ति जारी गर्दै नेपाली नागरिकको जीवनरक्षा र स्वास्थ्य उपचारको ग्यारेन्टी गर्ने जनाएको छ।
दूतावासले उनीहरूको बैधानिक अधिकार र हित संरक्षण गर्न चीन सक्रिय भूमिका निभाउने बताएको छ। सरकारले चीनमा रहेका नेपालीका विषयमा चासो राखिरहेका बेला दूतावासले उनीहरुलाई आवश्यक हरेक किसिमका सहयोग गर्न तयार रहेको भन्दै मेडिकल केयरको ग्यारेन्टी गरेको जनाएको छ।
दूतावासले विज्ञप्तिमा चीन सरकारले अन्तर्राष्ट्रिय दायित्व उच्च जिम्मेवारीका साथ बहन गरिरहेको जनाएको छ। जस अन्तरगत चीनमा रहेका विदेशी नागरिकको स्वास्थ्यमा विशेष ध्यान दिइएको जनाएको छ। चिनियाँ विदेश मन्त्रालयले विदेशी नागरिकको स्वास्थ्य हेरचाह र संक्रमित विदेशी नागरिकसँग समन्वय गर्न संयन्त्र गठन गरेर काम गरिरहेको जनाएको छ।
चीनमा कोरोना भाइरसको संक्रमणले २५९ जनाको मृत्यु भइसकेको छ भने १२ हजार भन्दा बढीमा यसको संक्रमण देखा परेको छ। विश्वका अन्य राष्ट्रमा भने संक्रमितको संख्या १०६ पुगेको छ।