मुक्तिनाथ बैंकको शाखा कार्यालयमा आगलागी

पर्सा– वीरगञ्जको लिंकरोडस्थित मुक्तिनाथ विकास बैंकको शाखा कार्यालयमा आगलागी भएको छ।

वीरगञ्ज–८ स्थित नगर विकास समितिको भवनमा रहेको बैंकको शाखामा शुक्रबार राति ११ बजेतिर आगलागी भएको हो।

आगलागीबाट एक दर्जन कम्प्युटर, तीन थान प्रिन्टर, २ सेट सोफा, ४ थान एसी, फर्निचरलगायत सामान र कागजपत्र जलेर नष्ट भएको बैंकले जनाएको छ। उनका अनुसार महत्त्वपूर्ण कागजात र रकम भने सुरक्षित छ।

आगलागीबाट १५ लाख रूपैयाँ बराबरको क्षति भएको अनुमान गरिएको भए पनि यसको यकिन विवरण आउन बाँकी रहेको प्रहरीले जनाएको छ।

सुरक्षा गार्डले बैंकभित्र आगो लागेको देखेपछि प्रहरीलाई जानकारी दिएका थिए।

आगलागीको कारण भने खुलेको छैन। प्रहरीले विद्युत सर्ट भएर आगलागी भएको हुन सक्ने अनुमान गरेको छ।