गोरखा- दूध बेच्न गएकी महिलालाई ठक्कर दिएको टिप्परले फेरि ब्याक गरेर ज्यान लिएपछि गोरखा तनावग्रस्त बनेको छ ।
शुक्रबार बिहान दूध बेच्न निस्किएकी गोरखा नगरपालिका १० अमलापानीकी ५२ वर्षीया मनमाया तामाङलाई ठक्कर दिएको ग १ ख ८०२७ नम्बरको टिप्परले फेरि ‘ब्याक’ गरेर किचेको स्थानीय वासिन्दाले बताएका छन्। महिलाको घटनास्थल (गोरखकाली क्रसर नजिक) मै मृत्यु भएको छ ।
घटनापछि ठूलो संख्यामा स्थानीयले प्रदर्शन गरेका छन्। उनीहरुले मनमायालाई ठक्कर दिएको टिप्परसँगै अन्य दुईवटा टिप्पर जलाएका छन् ।
आक्रोशित स्थानीयले दर्जन बढि टिप्परमाथि तोडफोड समेत गरेको जिल्ला प्रहरी कार्यालय गोरखाका डिएसपी बासुदेव खतिवडाले जानकारी दिए । उनले २० वटा टिप्पर र ६ वटा एक्साभेटरमा तोडफोड भएको बताए।
डिएसपी खतिवडाका अनुसार मनमायाका आफन्तले उनको शव बुझ्न मानेका छैनन्। क्षतिपूर्तिसँगै क्रसरहरु बन्द नगरेसम्म शव नबुझ्ने आफन्तले अडान लिएका छन् उनीहरुले क्रसर सञ्चालकहरुलाई घटनास्थलमै ल्याउन पनि माग गरेका छन् ।
स्थिति तनावग्रस्त भए पनि प्रहरीले भीड नियन्त्रणमै राखेको डिएसपी खतिवडाले बताए । उनका अनुसार वार्ताको प्रयास भइराखेको छ भने शव र टिप्पर घटनास्थलमै छ। प्रहरीले चालकलाई नियन्त्रणमा लिएको छ ।