काठमाडौं- पश्चिमी न्यून चापीय प्रणालीका कारण शुक्रबार (आज) काठमाडौं उपत्यकासहित देशको मध्य भूभागको मौसम धुम्मिएको छ ।
मौसम धुम्मिए पनि आज काठमाडौं उपत्यकामा वर्षाको सम्भावना भने नरहेको मौसम पूर्वानुमान महाशाखाले जनाएको छ । आज दिनभरजसो नै मौसम धुम्मिने मौसमविद् गंगा नगरकोटीले जानकारी दिइन् । उनका अनुसार दिउँसो केहिबेर घाम लागेपनि फेरि बादलले आकाश ढाक्ने छ ।
अहिले मध्य र पूर्वी तराई क्षेत्रमा हुस्सु र कुहिरो लागेको छ । दिउँसो एक दुई ठाउँमा हल्का वर्षा हुने सम्भावना पनि रहेको मौसमविद् नगरकोटीले जानकारी दिइन् । भोलि (शनिबार) भने देशका विभिन्न ठाउँमा वर्षाका सम्भावना रहेको उनले बताइन् ।
यस्तो हुनेछ तीन दिनको मौसम
माघ १७ गते (शुक्रबार)
दिउँसोः देशको पूर्वी भू-भाग लगायत मध्य पहाडी भू-भागमा आंशिकदेखि सामान्य बदली रही बाँकि भू-भागमा आंशिक बदली रहनेछ । पुर्वी तथा मध्य पहाडी भू-भागका एक दुई स्थानमा अपरान्ह पश्चात हल्का बर्षाको सम्भावना रहेको छ।
राति: देशको पहाडी भू-भागमा आंशिक बदली रहि बाँकी भू-भागमा मौसम सामान्यतया सफा रहनेछ।
माघ १८ गते (शनिबार)
दिउँसोः देशभर आशिंकदेखि सामान्य बदली रहनेछ। देशको पहाडी भुभागका थोरै स्थानहरुमा हल्का वर्षाको संभावना रहेको छ। उच्च पहाडी तथा हिमाली भु-भागमा हल्कादेखि मध्यम हिमपातको संभावना रहेको छ।
राति: उच्च पहाडी तथा हिमाली भू-भागमा आंसिक देखि सामान्य बदली रहि हल्का हिमपातको सम्भावना रहेको छ। बाँकी भू-भागमा मौसम सामान्यतया सफा रहनेछ।
माघ १९ गते (आइतबार)
दिउँसोः पुर्वी तथा मध्य पहाडी भू-भागमा आंसिक बदली रहि बाँकी भू-भागमा मौसम सामान्यतया सफा रहनेछ।
रातीः देशभर मौसम सामान्यतया सफा रहनेछ।