क्रिस गेलले ईपीएल खेल्ने

काठमाडौं- युनिभर्स बोसका नामले चर्चित वेष्ट इण्डिजका विष्फोटक ब्याट्सम्यान क्रिस गेलले एभरेष्ट प्रिमियर लिग (ईपीएल) टी-ट्वान्टी क्रिकेट खेल्ने भएका छन्। ४० वर्षीय गेलले पोखरा राइनोजबाट ईपीएल खेल्न लागेका हुन्।

पोखराले बिहीबार पत्रकार सम्मेलन गर्दै गेललाई आइकनिक खेलाडीको रुपमा अनुबन्ध गरेको जानकारी दिएको छ। लामो समयको प्रयासपछि उनलाई टोलीमा ल्याउन सफल भएको टिमकी मालिक दिपा अग्रवालले बताइन्।

गेल प्रतियोगिताका लागि मार्च १२ मा नेपाल आइपुग्ने छन्। उनले ईपीएलका कति खेल खेल्छन् भन्ने कुरा भने तय भइसकेको छैन। आईपीएलको पूरा तालिका अझै नआइसकेकाले उनी ईपीएलमा कति खेल खेल्छन् भन्ने निश्चित हुन सकेको छैन। तर उनले कम्तिमा दुई खेल भने खेल्ने भएका छन्।

ईपीएल चैत १ गतेदेखि १५ गतेसम्म टियु क्रिकेट मैदानमा हुनेछ ।