काठमाडौं– सरकारका प्रवक्ता एवं सञ्चार तथा सूचना प्रविधिमन्त्री गोकुलप्रसाद बाँस्कोटाले गाँजाखेती खुला गर्ने विषयमा सरकारले अहिले नसोचेको बताएका छन्।
मन्त्रिपरिषद्को निर्णय सार्वजनिक गर्न आयोजित नियमति पत्रकार सम्मेलनमा मन्त्री बाँस्कोटाले भने, ‘अहिलेसम्म सरकारले गाँजाका विषयमा सोचेको छैन।’
सांसदहरुले गाँजा खुला गर्नुपर्ने लबिङ गरेकोबारे सञ्चारकर्मीले राखेको जिज्ञासामा उनले भने, ‘कुनै विषय राख्न माननीयज्यूहरुलाई स्वतन्त्रता छ। गाँजा खेतीलाई कानुनतः मान्यता दिइएको छैन। मान्छे लट्ठिन हो कि औषधिका लागि हो, त्यस विषयमा माननीयज्यूहरुले नै जान्नुहोला। पैसा आउँछ भन्दैमा जे पनि गर्न त मिल्दैन। यसको विश्वव्यापी मान्यता छ।’
हरेक विषयमा सरकारको दृष्टिकोण नखोज्न उनले सञ्चारकर्मीहरुलाई आग्रह पनि गरे। ‘सांसदहरुले सरकारसँग सोधेर गाँजा खुला गर्ने कुरा गर्नुभएको होइन । ल मेकर भइसकेपछि उनीहरुले जे पनि बोल्न सक्नुहुन्छ आफ्नो हिसाबले,’ उनले भने।