सुर्खेत- टिप्परको ठक्करबाट एक युवकको मृत्यु भएपछि पीडितहरुले तीन दिनदेखि सुरु गरेको आन्दोलन स्थगित भएको छ। पीडितका आफन्त, टिप्पर मालिक र प्रशासनबीच बिहीबार भएको पाँच बुदे सहमतिपछि आन्दोलन फिर्ता भएको हो।
टिप्पर चालक राजकुमार बोहोरालाई हदैसम्मको कारबाही गर्ने, पीडित पक्षलाई कानुनबमोजिम क्षतिपूर्तिका लागि तत्काल प्रक्रिया अगाडि बढाउने, आन्दोलनका क्रममा भएका घाइतेहरुको उपचार प्रदेश सरकारले गर्ने, शवको पोष्टमार्टमपछि आफन्तलाई बुझाउने र सम्पूर्ण विरोधका कार्यक्रम फिर्ता लिने सहमति भएको छ।
पीडितका आफन्त, टिप्पर मालिक हरि बिसी र प्रशासनबीच सहमति भएपछि आन्दोलनका सम्पूर्ण कार्यक्रम फिर्ता भएका छन्।
पीडितका मागहरुको सम्बोधन गर्न नसकेको भन्दै मृतकका आफन्त र स्थानीयवासीले आज बिहानैदेखि वीरेन्द्रनगरमा प्रदर्शन र यातायातका साधन ठप्प पारेका थिए। आन्दोेलनका क्रममा प्रहरीको लट्ठी लागेर दैलेखका ११ वर्षीय विमल नेपाली घाइते भएका थिए।
नेपालीको एउटा दाँत झर्नुका साथै ओठमा चोट लागेको छ। सहमतिपछि प्रहरीले नियन्त्रणमा लिएका आन्दोलनकारीलाई छोडेको छ।