लन्डन– इंग्लिस प्रिमियर लिगअन्तर्गत बुधबार राति भएको खेलमा क्लब विश्वकप विजेता लिभरपुलले घरेलु टोली वेस्टह्याममाथि जित निकालेको छ।
लन्डन स्टेडियममा भएको खेलमा लिभरपुलले २–० ले जित हात पारेको हो। लिभरपुलका लागि मोहम्मद सलाह र एलेक्स अक्सलेड चेम्बरलेनले १–१ गोल गरेका थिए।
लिभरपुलले ३५ औं मिनेटमा पाएको पेनाल्टीको अवसर सदुपयोग गर्दै सुरुवाती गोल गर्यो। लिभरपुलका मोहम्मद सलाहले पेनाल्टीमा गोल गरेर लिभरपुललाई अग्रता दिलाए। खेलको ३४ औं मिनेटमा वेस्टह्यामका डिफेन्डर इस्सा डायोपले डिभोक ओरिगीलाई फउल गरेपछि डायोपले पहेँलो कार्ड खाएका थिए भने लिभरपुलले पेनाल्टी पाएको थियो।
पहिलो हाफमा लिभरपुल १–० ले अगाडि रह्यो। दोस्रो हाफमा चेम्बरलेनले अर्को गोल थप्दा लिभरपुलले २–० को जित निकाल्न सफल भयो। दोस्रो गोल चेम्बरलेनले खेलको ५२ औं मिनेटमा गरेका थिए।
जितसँगै जारी लिगमा अपराजित लिभरपुलले १९ अंकको अग्रता बनाएको छ। लिभरपुल पछिल्ला ४१ खेलमा अपराजित छ।
जारी सिजन २४ खेल खेलेको लिभरपुलले २४ जित र १ बराबरी सहित ७० अंक जोड्दै शीर्ष स्थानमा कायम छ। त्यस्तै, दोस्रो स्थानमा रहेको म्यानचेस्टर सिटीले २४ खेलमा १६ जित ३ बराबरी र ५ हार सहित ५१ अंक जोडेको छ।