कोरोना संक्रमितका लागि चीनमा ५ दिनमै अस्पताल तयार

काठमाडौं- चीनमा कोरोना भाइरसका संक्रमितहरुको उपचारका लागि पाँच दिनमै अस्पताल तयार भएको छ। एक हप्तामा तयार गर्ने भनिएको अस्पताल तोकिएको भन्दा दुई दिनअघि नै तयार भएको हो।

कोरोनाको संक्रमण महामारीका रुपमा फैलिन थालेपछि सबैभन्दा बढी प्रभावित हुबेई प्रान्तको वुहानमा विशेष अस्पताल निर्माण गरिएको हो। पाँच दिनमा तयार गरिएको अस्पतालमा मंगलबारदेखि कोरोना संक्रमित बिरामीहरु भर्ना भइसकेका छन्।

सयौं मेशिनहरुको प्रयोग र हजारौं कामदार प्रयोग गरेर एकैदिनमा भवन निर्माण सम्पन्न गरिएको थियो। बाँकी चार दिनमा भवनमा आवश्यक सर्जिकल उपकरणहरुको व्यवस्थापन गरिएको थियो।

यो सुविधासम्पन्न अस्पतालमा एकै पटक एक हजार विरामीले उपचार गराउन सक्नेछन्।

गत बिहीबार सरकारले कोरोना संक्रमितका लागि नयाँ अस्पताल बनाउने घोषणा गरेलगत्तै वुहान प्रान्तको ह्वाङगाङमा अस्पताल निर्माण सुरु गरिएको थियो।

यसअघि सन् २००३ मा सार्स भाइरसको संक्रमण फैलिएपछि बेइजिङमा ७ दिनमा नयाँ अस्पताल निर्माण गरेर सेवा सुरु गरिएको थियो।

चिनियाँ अधिकारीहरुका अनुसार कोरोना भाइरसका कारण करिब साढे १ हप्ताको अबधिमा १३२ जनाको मृत्यु भइसकेको छ भने ६ हजार भन्दा बढी संक्रमितले उपचार गराइरहेका छन्।

डेलीमेल डटकमबाट