काठमाडौं- आफैंले बोकेको बन्दुक पड्किँदा बर्दियामा एक प्रहरी जवान घाइते भएका छन्।
इलाका प्रहरी कार्यालय ढोडरीमा कार्यरत गंगाराम थारुको तिघ्रामा गोली लागेको प्रहरी उपरीक्षक राजेशनाथ बास्तोलाले जानकारी दिए। घाइते थारुलाई उपचारका लागि नेपालगन्ज पठाइएको उनले बताए। नेपाल प्रहरीका प्रवक्ता शैलेश थापा क्षेत्रीले चन्द समूहका कार्यकर्तालाई नियन्त्रणमा लिने क्रममा प्रहरी जवान थारुले बोकेको बन्दुक पड्किएको जानकारी दिए।
"मधुवन गाउँपालिका–४ मा नेत्रविक्रम चन्द नेतृत्वको प्रतिवन्धित नेकपाका कार्यकर्तालाई पक्राउ गर्ने क्रममा प्रहरी जवान गंगाराम थारुले बोकेको बन्दुक पड्किएर आफ्नै तिघ्रामा लागेको हो। यसबारे थप अनुसन्धान भइरहेको छ," थापाले भने।
प्रहरीले प्रतिवन्धित नेकपाका रोहित सुनार र जयबहादुर ठाडामगरलाई पक्राउ पनि गरेको छ। उनीहरुको साथबाट हतियारसमेत बरामद भएको प्रहरीले जनाएको छ।
एनसेल टावरमा आगजनी गर्ने समूह गाउँमा लुकेर बसेको भन्ने सूचनाका आधारमा प्रहरी उनीहरुलाई पक्राउ गर्न पुगेको थियो।
*यसअघि प्रहरीबाटै प्राप्त सूचनाका आधारमा तयार पारिएको समाचारमा 'आफैंले बोकेको बन्दुक पड्किँदा हुनुपर्नेमा अन्यथा भएकोले सच्याइएको छ।