सभामुख सापकोटाविरुद्धको रिटमा सर्वोच्चले यस्तो दियो आदेश (पूर्णपाठसहित)

काठमाडौं– सर्वोच्च अदालतले अग्निप्रसाद सापकोटाविरुद्ध दायर भएको कर्तव्य ज्यान मुद्दाको प्रगति विवरण ३० दिनभित्र पेस गर्न आदेश गरेको छ।

वरिष्ठ अधिवक्ता दिनेश त्रिपाठीले दायर गरेको रिटमा सुनुवाइ गर्दै मंगलबार न्यायाधीश सपना प्रधान मल्लको इजलाशले यस्तो आदेश गरेको हो।

सापकोटालाई सभामुख बनाउन नहुने माग गर्दै परेको रिटमा माग गरिएबमाेजिम अन्तरिम आदेश जारी गर्न भने सर्वाेच्चले अस्वीकार गरेको छ।

हिजो सुनुवाइ नसकिएपछि उक्त रिट हेर्दाहेर्दैमा राखिएको थियो। यसअघि पहिलो दिन न्यायाधीश हरि फुयाँलको इजलासमा सो रिट परेको थियो। फुयाँलले हेर्न नमिल्ने भएपछि न्यायाधीश मल्लको इजलासमा मुद्दा परेको थियो।

सभामुखमा निर्वाचित भएर सापकोटाले शपथ ग्रहण गरी कार्यभारसमेत सम्हालिसकेका छन्।