‘प्रधानमन्त्रीज्यू कुरा लोकतन्त्रका गर्नुहुन्छ तर विधेयक कल ट्यापिङ गर्ने ल्याउनुहुन्छ’

काठमाडौं– प्रमुख प्रतिपक्षी दल नेपाली कांग्रेसका सभापति एवम् पूर्व प्रधानमन्त्री शेरबहादुर देउवाले पूर्ण प्रेस स्वतन्त्रता र व्यक्तिगत स्वतन्त्रताविरुद्धका विधेयकहरु सरकारले फिर्ता लिनुपर्ने बताएका छन्।

मंगलबार संसद बैठकलाई सम्बोधन गर्दै देउवाले पूर्ण प्रेस स्वतन्त्रता र मानवअधिकार बिना प्रजातन्त्रको कल्पनासमेत गर्न नसकिने भन्दै सरकारले ल्याउन लागेका प्रतिकूल विधेयकहरु फिर्ता लिनुपर्ने बताएका हुन्।

‘प्रधानमन्त्रीज्यू कुरा लोकतन्त्रका गर्नुहुन्छ तर विधेयक भने व्यक्तिगत फोन कल ट्यापिङ गर्नेसम्मको ल्याउनुहुन्छ,’ देउवाले भने, ‘कुरा मात्रै गरेर भएन, त्यस्ता विधेयक हटाउनुपर्छ।’

संविधानको मर्म र भावना विरुद्धका त्यस्ता विधेयकहरु पास हुन नदिने देउवाले बताए। सरकारले प्रतिपक्षलाई विश्वासमा लिएर काम गर्नुपर्नेमा जोड दिँदै देउवाले सदनमा उठेका कुरा सरकारले गम्भिर रुपमा लिनुपर्ने बताए।

सभामुख कुनै पार्टीको नभएर साझा हो भन्दै देउवाले प्रतिपक्षलाई विश्वासमा लिएर काम गरे मात्र कांग्रेसको सहयोग रहने बताए।

उखु किसानले चिनी मिलबाट पैसा नपाउनु दुखद् भएको भन्दै देउवाले सरकारले गम्भिरतापूर्वक लिनुपर्नेमा जोड दिए।

कोरोना भाइसरको जोखिममा नेपाल पनि परिसकेकाले आवश्यक ठाउँमा २४ घण्टे हेल्थ डेस्क राख्न सरकारलाई उनले सुझाव दिए। साथै देउवाले नेपाललाई ठूलो सहयोग आउन लागेकाले एमसीसी पास गर्नुपर्ने बताए।