दाङ– दाङमा छुट्टाछुट्टै स्थानमा चितुवाको छाला र चरेससहित पाँच जना पक्राउ परेका छन्।
जिल्ला प्रहरी कार्यालय, दाङका अनुसार चितुवाको छालासहित दुई र लागुऔषध चरेशसहित तीन जना पक्राउ परेका हुन्।
घोराही–१४ स्थित बसपार्कबाट चितुवाको छालासहित दंगीशरण गाउँपालिका–१, का २४ वर्षीय चेतबहादुर पुन र सोही ठाउँकै सौगात घर्ती पक्राउ परेको प्रहरीले जनाएको छ। प्रहरीका अनुसार उनीहरूको साथबाट चितुवाको टाउको, बंगारा र पुच्छरसमेत रहेको चितुवाको छाला बरामद गरिएको छ।
यस्तै, दाङको तुलसीपुर उपमहानगरपालिका–१२, शितलपुरबाट साढे दुई किलो चरेससहित तीन जना पक्राउ परेका छन्।
जिल्ला प्रहरी कार्यालयका अनुसार लागुऔषध चरेशसहित रुकुम, मुसिकोट नगरपालिका–२, रातामाटाका २१ वर्षीय अनिल पुनमगर, सोही नगरपालिका–६ का ४० वर्षीय बहादुर बोहोरा र आठबिसकोट नगरपालिका–९ का २८ वर्षीय भीमबहादुर सार्की पक्राउ परेका हुन्।
जिल्ला प्रहरी कार्यालयबाट खटिएको टोलीले गोप्य सूचनाका आधारमा उनीहरूलाई लागुऔषधसहित पक्राउ गरेको हो।
पक्राउ परेकामाथि आवश्यक अनुसन्धान भइरहेको प्रहरीले जनाएको छ।