सुर्खेत - जुम्लामा माटोको ढिस्कोमा पुरिएर दुई जनाको मृत्यु भएको छ। घर लिप्ने माटो लिन गएका चन्दननाथ नगरपालिका–४ सिंहाचौरका ४५ वर्षीय नाक्चु सुनार र २५ वर्षीय स्यान सुनारको मृत्यु भएको हो।
जिल्ला प्रहरी कार्यालय जुम्लाका डिएसपी लालबहादुर धामीले दिएको जानकारीअनुसार घर लिप्ने रातो माटो लिन उनीहरु मालाभिडको जंगलमा गएका थिए। माटो खन्दैगर्दा सोमबार साढे तीन बजेतिर उनीहरु ढिस्कोमा पुरिएका थिए।
मृत्यु हुने दुबै जना नाताले सासुबुहारी हुन्। दुबैको घटनास्थलमै मृत्यु भएको हो। यस्तै माटो लिन गएका सोही ठाउँका नविना ऐडी र पञ्चकन्या सुनार घाइते भएका प्रहरीले जनाएको छ। घाइते दुबै जनाको कर्णाली स्वास्थ्य विज्ञान प्रतिष्ठानमा उपचार भैरहेको प्रहरीले जनाएको छ ।