काठमाडौं- सरकारी एम्बुलेन्स नै लागु औषध ओसार्न प्रयोग हुने गरेको पाइएको छ। रौतहट डुमरिया स्वास्थ्य चौकीको बा २ झ १७४९ नम्बरको सरकारी एम्बुलेन्स साढे ३० किलो गाँजासहित समातिएसँगै यसको खुलासा भएको हो।
एम्बुलेन्समा हालेर साढे ३० किलोग्राम लागु औषध गाँजा मनहरीबाट हेटौंडातर्फ लैजाँदै गरेकाे अवस्थामा मकवानपुर प्रहरीले शनिबार बेलुका ३ जनालाई पक्राउ गरेको छ।
हेटौडा उपमहानगरपालिका–१९ स्थित ईलाका प्रहरी कार्यालय नेवारपानी अगाडि पूर्व पश्चिम लोकमार्गमा चेकजाँचका क्रममा एम्बुलेन्सबाट गाँजासहित तीन जनालाई पक्राउ गरेको हो ।
जिल्ला प्रहरी प्रमुख सुशीलसिंह राठौरका अनुसार पक्राउ पर्नेमा एम्बुलेन्स चालक रौतहट डुमरीया नगरपालिका–९ का ३९ वर्षीय महमद खलिद, एम्बुलेन्समा सवार डुमरीया–४ का १९ वर्षीय अशोक कुमार र भारत बिहार मोतिहारीका २२ वर्षीय बिनोद सहनी छन्।
एम्बुलेन्समा लुकाई छिपाई ल्याएको ३ वटा झोला भित्र ६ वटा पोकामा ३० किलो ६०० ग्राम लागू औषध गाँजा र नेपाली रूपैयाँ ९१ हजार र भारतीय रूपैया २ हजार २ सय फेला परेको उनले जानकारी दिए ।
प्रहरी नायव निरीक्षक राजेश कुमार यादवको कमाण्डमा खटिएको टोलीले पक्राउ गरेको हो। मकवानपुर प्रहरीले पछिल्लो करिव एक महिनाको अवधिमा ट्रक, कार र मोटरसाईकल गरी ५ वटा सवारी साधनमा एक क्वीन्टल बढी गाँजा र १२ जनालाई पक्राउ गरेको छ।