काठमाडौँ- सभामुखका उम्मेदवार अग्नि सापकोटालाई तत्काल पक्राउ गर्न माग गर्दै परेको रिटमाथि आज (आइतबार)बाट प्रारम्भिक सुनुवाइ सुरु हुँदैछ ।
न्यायाधीश हरि फुयाँलको एकल इजलासमा रिटमाथिको सुनुवाइ हुन लागेकाे हो । इजलासको पहिलो नम्बरमै मुद्दाको पेशी रहेकाले कार्यालय खुल्ने वित्तिकै उनको सुनुवाइ प्रारम्भ हुने सर्वोच्च प्रशासनले जनाएको छ ।
शुक्रबार वरिष्ठ अधिवक्ता दिनेश त्रिपाठीले हत्या आरोपी सापकोटालाई तत्काल पक्राउ गरि अनुसन्धान प्रक्रिया अगाडि बढाउन माग गर्दै रिट दायर गरेका थिए ।
यसैगरी, सापकोटालाई पक्राउ नगर्ने प्रहरी अधिकारीलाई कारवाही गर्न र सापकोटाको विषयमा विशेष छानविन समिति बनाउने आदेश दिन पनि रिटमा माग गरिएको छ।
सापकोटा काभ्रेका अर्जुन लामाको अपहरण तथा हत्याका आरोपी हुन्। २०६२ वैशाख १६ गते काभ्रेको छत्रबाँझस्थित कृष्ण माध्यमिक विद्यालय व्यवस्थापन समितिका अध्यक्ष लामालाई अपहरण गरेर हत्या गरेको उनीमाथि आरोप छ।
यससम्बन्धी मुद्दा अदालतमा विचाराधीन छ। मुद्दाको पेसी भने यही माघ २२ गतेका लागि तोकिएको छ।
आजै सभामुखको निर्वाचन हुँदैछ । सभामुखको एकल उम्मेदवार रहेका सापकोटा निर्विरोध निर्वाचित हुने निश्चित छ ।