काठमाडौं - भारतले न्युजिल्याण्डविरुद्धको पाँच खेलको टी-ट्वान्टी सिरिजमा १-० को अग्रता बनाएको छ। भारतले शुक्रबार घरेलु टिम न्युजिल्याण्डलाई ६ विकेटले पराजित गर्यो।
अकल्याण्डमा सम्पन्न खेलमा न्युजिल्याण्डले दिएको २ सय ४ रनको लक्ष्य पछ्याएको भारतले १९ ओभरमा ४ विकेट गुमाउँदै लक्ष्य पुरा गर्यो। भारतका लागि श्रेयर अएरले अविजित रहँदै सर्वाधिक ५८ रन जोडे। उनी खेलका म्यान अफ द म्याचसमेत चुनिए। यस्तै केएल राहुलले ५६ रन जोड्दा कप्तान विराट कोहलीले ४५ रन बनाए। न्युजिल्याण्डका सोधीले दुई तथा मिचेल स्यान्टनर र ब्लेयर टिकनरले समान एक/एक विकेट लिए।
त्यसअघि टस हारेर पहिले ब्याटिङ गरेको न्युजिल्याण्डले निर्धारित २० ओभरमा ५ विकेट गुमाउँदै २ सय ३ रन जोडेको थियो। न्युजिल्याण्डका तीन खेलाडीले अर्धशतक पुरा गरे। कोलिन मुन्रोले सर्वाधिक ५९ रन बनाउँदा रोस टेलरले अविजित ५४ तथा कप्तान केन विलियम्सनले ५१ रन बनाए। भारतका रविन्द्र जडेजा, शिवम् दुवे, युजवेन्द्र चहल, शार्दुल ठाकुर र जसप्रित बुमराहले समान एक/एक विकेट लिए।
दोस्रो टी-ट्वान्टी खेल आइतबार हुने छ।