घुस रकमसहित पक्राउ

काठमाडौं– नेपाल विद्युत् प्राधिकरण कुलेश्वर वितरण केन्द्रमा ज्यालादारीमा कार्यरत कृष्णमुरारी चौधरी र पुरुषोत्तम दाहाल २५ हजार रुपैयाँसहित पक्राउ परेका छन्।

बिजुलीको पोल राखिदिने विषयमा सेवाग्राहीसँग घुस लिएको आरोपमा चौधरी दाहाललाई अख्तियारको टोलीले पक्राउ गरेको हो। उनीहरूमाथि अनुसन्न्धान भइरहेको अख्तियारले जनाएको छ।

यसैगरी पुनः निर्माण प्राधिकरणका कर्मचारी ६ हजार रुपैयाँ घुस लिएको अभियोगमा पक्राउ परेका छन्।

पुनःनिर्माण प्राधिकरणअन्तर्गत भोजपुर नगरपालिकामा कार्यरत सबइन्जिनियर प्रकाश तिवारीलाई घुस लिँदै गर्दा अख्तियार टोलीले पक्राउ गरेको छ। तिवारीलाई शुक्रबार ६ हजार रुपैयाँ घुससहित भोजपुरको प्रधान होटलबाट पक्राउ गरिएको हो।