अग्नि सापकोटालाई पक्राउ गर्न माग गर्दै सर्वोच्चमा रिट, पेसी आइतबार

काठमाडौं– सभामुखका निर्विरोध उम्मेदवार अग्निप्रसाद सापकोटालाई पक्राउ गर्न माग गर्दै सर्वोच्च अदालतमा रिट दायर भएको छ। वरिष्ठ अधिवक्ता दिनेश त्रिपाठीले आज (शुक्रबार) दायर गरेको रिटमा अदालतबाट ५ वटा विषयमा आदेश माग गरिएको छ।

उनले दायर गरेको रिटको पेसी आइतबार तोकिएको छ। त्रिपाठीले दायर गरेको रिटमा सभामुखको निर्वाचन प्रक्रिया रोक्न र सापकोटालाई पक्राउ गरी अनुसन्धान प्रक्रिया अगाडि बढाउन माग गरिएको छ।

यसैगरी, सापकोटालाई पक्राउ नगर्ने प्रहरी अधिकारीलाई कारवाही गर्न र सापकोटाको विषयमा विशेष छानविन समिति बनाउने आदेश दिन पनि रिटमा माग गरिएको छ।

सापकोटा काभ्रेका अर्जुन लामाको अपहरण तथा हत्याका आरोपी हुन्। यससम्बन्धी मुद्दा अदालतमा विचाराधीन छ। मुद्दाको पेसी भने यही माघ २२ गतेका लागि तोकिएको छ।

सभामुखका लागि १२ माघमा ताेकिएकाे निर्वाचनका लागि सापकाेटाकाे मात्र उम्मेदवारी दर्ता भएकाे छ। उनी निर्विराेध भए पनि घाेषणा भने १२ गतेमात्रै हुनेछ। सर्वाेच्चमा दायर भएकाे रिटकाे पेसी पनि साेही दिनका लागि ताेेकिएकाे छ।