बुहारीलाई छाउगोठ पठाउने जेठाजुलाई ४५ दिन जेल

अछाम– महिनावारी हुँदा छाउगोठ पठाएको भन्दै पहिलो पटक एक जनालाई जेल सजाय भएको छ।

जिल्ला अदालत, अछामले बुहारीलाई छाउगोठ पठाएको अभियोगमा दोषी ठहर गर्दै बिहीबार साँफेबगर–३ का छत्र रावतलाई ४५ दिन जेल पठाउने फैसला सुनाएको हो।

मुलुकी अपराध संहिताको धारा १६८ को ३ बमोजिम छत्रलाई सजाय सुनाइएको अदालतले जनाएको छ। अपराध संहितामा छुवाछुत गर्ने र गराउने दुवैलाई कानुनी कारवाहीको व्यवस्था छ।

गत मंसिर १५ गते छत्रकी बुहारी पार्वतीको छाउगोठमा ज्यान गएको थियो।

घटनापछि प्रहरीले पार्वतीलाई छाउगोठ पठाएको अभियोगमा उनका जेठाजु छत्रलाई पक्राउ गरेको थियो। पार्वतीका सासू–ससुरा र श्रीमान् घरमा छैनन्। 

सरकारले छाउपडी प्रथा उन्मुलनका लागि सुदूरपश्चिम र कर्णाली प्रदेशमा छाउगोठ भत्काउने अभियान सञ्चालन गरिरहेको छ।