जनकपुरधाम - राष्ट्रियसभा सदस्य निर्वाचन हुन दुई दिन बाँकी छँदा राष्ट्रिय जनता पार्टी (नेपाल) का मतदाताहरुलाई बर्दिवासस्थित एक होटलमा राखिएको छ। राष्ट्रियसभा सदस्य निर्वाचनमा प्रदेश २ का सबै मतदाताहरुलाई महोत्तरीको बर्दिवासस्थित होटल पावन मिथिलामा राखिएको छ।
पार्टी अध्यक्षमण्डलको निर्णयअनुसार मंगलबार र बुधबार बर्दिवासस्थित होटलमा राख्ने व्यवस्था भएको जनाइएको छ। दुईदिन बर्दिवासमा राखेर राष्ट्रियसभा निर्वाचनको दिन मतदानको लागि मतदाताहरुलाई सोझै जनकपुर ल्याउने योजना छ। मतदाताहरुलाई मतदानलगायत पार्टीको विषयमा प्रशिक्षण दिइने भनेर होटलमा राखिएको प्रदेशसभाका एकजना सदस्यले बताए।
बर्दिवासस्थित होटलमा राजपा अध्यक्षमण्डलका संयोजक महेन्द्रराय यादवबाहेक अध्यक्षमण्डलका सबै सदस्यहरुसमेत पुगेका छन्। ती प्रदेशसभा सदस्यकाअनुसार राजपा अध्यक्षमण्डलका सदस्य महन्थ ठाकुर, राजेन्द्र महतो, शरतसिंह भण्डारी, अनिल झा र राजकिशोर यादव बर्दिवास पुगेका छन्।
मतदानमा ‘फ्लोर क्रस’ गर्नसक्ने आशंकामा राजपाका मतदाताहरुलाई प्रशिक्षणको नाममा होटलमा राखिएको कतिपयले अथ्र्याएका छन्। राष्ट्रियसभा निर्वाचनमा नेकपासँगको सहकार्य र टिकट वितरणप्रति राजपाभित्र विवाद देखिएको छ। प्रदेशसभा सदस्यसहित स्थानीय तहका अध्यक्ष/उपाध्यक्ष र मेयर/उपमेयर गरी प्रदेश २ मा राजापाबाट ७९ जना मतदाता छन्।