विराटनगर– नेपाल र भारतका प्रधानमन्त्रीले आज संयुक्तरूपमा भिडियो कन्फ्रेन्समार्फत मोरङको बुधनगरस्थित नेपाल–भारत एकीकृत जाँच भन्सार विन्दु (आईसीपी)को उद्घाटन गर्दैछन्।
प्रधानमन्त्री केपी शर्मा ओलीले सिंहदरवारबाट र भारतका समकक्षी नरेन्द्र मोदीले नयाँ दिल्लीबाट बिहान ११ बजे संयुक्तरूपमा आईसीपी उद्घाटन गर्ने कार्यक्रम तय भएको संघीय आयोजना कार्यान्वय इकाई मोरङले जनाएको छ।
आयात तथा निर्यात पारवहन सहज बनाउन विराटनगर महानगरपालिका–१८ मा आईसीपी निर्माण गरिएको हो।
आईसीपी सञ्चालनसँगै आयात–निर्यात सहज हुने ठानिएको छ ।
आईसीपी निर्माणका लागि दिनेशचन्द्र एन्ड आर अग्रवाल इन्फा डटकमलाई ठेक्का दिइएको थियो। सम्झौताअनुसार भवन, पार्किङस्थल, जाँच पोष्टसहितका संरचना निर्माण गरेको छ। आईसीपी १२९ बिघा क्षेत्रफलमा फैलिएको छ।
आईसीपी निर्माण लक्ष्यभन्दा १५ महिनापछि मात्रै सम्पन्न भएको हो। सम्झौतामा यसको निर्माण दुई वर्षमा सक्ने लक्ष्य छ।