काठमाडौं– निर्वाचन आयोगले बिहीबार हुने राष्ट्रियसभा निर्वाचनका लागि सम्पूर्ण तयारी पूरा गरेको जनाएको छ।
आयोगका प्रवक्ता राजकुमार श्रेष्ठले सबै निर्वाचन अधिकृतको कार्यालयमा मतदान सामग्री, कर्मचारी, मतपत्र पुगिसकेको बताए।
आगामी फागुन २० गते रिक्त हुन लागेका राष्ट्रियसभाका एकतिहाइ (१९) सदस्यमध्ये १८ का लागि निर्वाचन हुन लागेको हो। जसअन्तर्गत प्रदेश १ मा तीन, प्रदेश २ मा चार, बागमती प्रदेशमा दुई, गण्डकी प्रदेशमा दुई, प्रदेश ५ मा तीन, कर्णाली प्रदेशमा दुई र सुदूरपश्चिम प्रदेशमा दुई जना गरी १८ सदस्यका लागि निर्वाचन हुँदैछ।
उक्त पदका लागि विभिन्न राजनीतिक दलका ४५ जना उम्मेदवार प्रतिस्पर्धामा छन्। निर्वाचनमा दुई हजार ५६ मतदाता छन्, जसमा प्रदेशसभा सदस्य ५ सय ५० र स्थानीय तहका सदस्य १ हजार ५ सय ६ छन्।
राष्ट्रियसभामा रिक्त हुन लागेका एकतिहाइ सदस्यमध्ये १ लाई भने सरकारको सिफारिसमा राष्ट्रपतिले मनोनित गर्नेछिन्।