भलिबल क्लब च्याम्पियनसीप : एपिएफको लगातार दोस्रो जित

काठमाडौं- पाँचौं संस्करणको आरबीबी–एनभीए राष्ट्रिय पुरुष–महिला भलिबल क्लब च्याम्पियनसीपमा महिला क्लब अन्तर्गत आज (आईतबार) सम्पन्न खेलमा एपिएफले जित हात पारेको छ।

सशस्त्र प्रहरीको विभागीय टोली एपिएफले भरतपुर मेट्रो खेलकुद परिषद्लाई ३–० को सोझो सेटमा हराएको हो।

एपिएफले भरतपुरलाई २५–११, २५–१२ र २५–१० को सेटमा पराजित गर्यो। यसका साथै साविक विजेतासमेत रहेको एपिएफले लगातार दोस्रो जित निकालेको छ। उसले दुई खेल जितेर ६ अंक बनाएको छ।

आजै भएको पुरुषतर्फको खेलबाट हेल्प नेपाल स्पोर्टस् क्लब क्वाटरफाईनलमा प्रवेश गरेको छ।

क्लब च्याम्पियनसीपको समूह ‘डी’ मा रहेका दुई मात्र क्लबको समूह विजेता बन्दै हेल्प नेपाल क्वाटरफाईनलमा प्रवेश गरेको हो।

उसले बुद्धटोल युवा क्लबलाई ३–० को सेटमा पराजित गर्यो।

२५–१०, २५–१५ र २५–११ को सेटमा हेल्प नेपालले जित निकाल्दै तीन अंक जोड्न सफल भयो।

‘डी’ समू्हमा दुई टोली मात्र भएपछि पराजित बुद्धटोल पनि समूहको उपविजेता बन्दै क्वाटरफाईनलमा प्रवेश गरेको छ।