सत्य निरुपणमा भट्ट र बेपत्ता छानबिन आयोगमा सुवेदी सिफारिस

काठमाडौं— सत्य निरुपण तथा मेलमिलाप र बेपत्ता पारिएका व्यक्तिको छानबिन आयोगमा पदाधिकारीका लागि नाम सिफारिस भएको छ ।

पूर्व प्रधानन्यायाधीश ओमप्रकाश मिश्र संयोजकत्वको सिफारिस समितिले सत्य निरुपण तथा मेलमिलाप आयोगको अध्यक्षमा गणेशदत्त भट्ट तथा सदस्यमा प्रचण्डमान श्रेष्ठ, गोविन्द गौतम, मन दाहाल र विष्णु पोखरेलको नाम सिफारिस गरेको हो ।

भट्ट र श्रेष्ठ कांग्रेसकातर्फबाट सिफारिसमा परेका हुन् भने गौतम, दाहाल र विष्णु नेकपाका तर्फबाट सिफारिसमा परेका हुन्।

यसैगरी बेपत्ता पारिएका व्यक्तिको छानविन आयोगको अध्यक्षमा युवराज सुवेदी तथा सदस्यमा विष्णु भण्डारी, सुनिल रञ्जन सिंह, डा. गंगाधर अधिकारी र सरिता थापाको नाम सिफारिस गरिएको छ।

सुवेदी र भण्डारी नेकपाका तर्फबाट हुन् भने सिंह, अधिकारी र थापा कांग्रेसका तर्फबाट हुन्।

सिफारिस समितिले शनिबार दुवै आयोगमा पाँच-पाँच जना पदाधिकारी सिफारिस गरेको कानुन, न्याय तथा संसदीय मामिला मन्त्रालयले जानकारी दिएको छ।

बेपत्ता छानविन र सत्य निरुपण आयोगमा पदाधिकारी नियुक्ति र विधेयकमा नेकपा र कांग्रेसबीच सहमति