काठमाडौं- हिंसात्मक द्वन्द्वकालीन मुद्दालाई छिटो टुंगाउने विषयमा सत्तारुढ नेकपा र प्रतिपक्षी नेपाली कांग्रेसबीच सहमति बनेको छ।
प्रधानमन्त्री केपी ओली, नेकपाका अर्का अध्यक्ष पुष्पकमल दाहाल र प्रमुख नेपाली कांग्रेसका सभापति शेरबहादुर देउवा लगायतबीच आज बालुवाटारमा भएको छलफलमा सत्य निरुपण तथा मेलमिलाप तथा वेपत्ता व्यक्तिको छानविन आयोगमा पदाधिकारी नियुक्तिका विषयमा सहमति भएको हो ।
त्यस्तै दुवै पक्ष सत्य निरुपण तथा मेलमिलाप आयोग र वेपत्ता व्यक्तिको छानविन सम्बन्धी विधेयकलाई अगाडि बढाउन पनि सहमत भएका छन्।
बैठकमा ओली, दाहाल, देउवा, नेकपा नेता सुवासचन्द्र नेम्वाङ, खिमलाल देवकोटा, कांग्रेसका नेताहरु मिनेन्द्र रिजाल र रमेश लेखक सहभागी थिए।
बैठकमा सहभागी एक नेताका अनुसार ऐन संशोधन सम्बन्धी विधेयक चाँडै संसदमा पेश गर्ने र पूर्वप्रधानन्यायाधीश ओमप्रकाश मिश्रको संयोजकत्वमा गठित पदाधिकारी सिफारिस समितिको सिफारिस अनुसारका नामहरु स्वीकृत गर्ने समेत सहमति भएको हो।
समितिको बैठक पनि आजै बस्ने र बैठकले नामहरु आजै सिफारिस गर्ने बुझिएको छ।
झण्डै ६ वर्षअघि पुस २०७० मा सर्वोच्च अदालतले पीडित अनुकुल हुने गरी गम्भीर अपराधका मुद्दामा पीडकलाई छुट्न नदिने गरी ऐन संशोधन गर्न परमादेश दिएको थियो । सोही बमोजिम विधेयक संसदमा प्रस्तुत गरिने सहमित भएको ती नेताले बताए।