काठमाडौं– पाँचौं आरबीबी–एनभीए राष्ट्रिय महिला–पुरुष भलिबल क्लब च्याम्पियनसिपअन्तर्गत महिलातर्फ विभागीय टोली एपीएफ र त्रिभुवन आर्मी क्लबले विजयी सुरुवात गरेका छन्।
त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा आज (शनिबार) भएको पहिलो खेलमा साविक विजेता एपीएफले जावलाखेल भलिबल प्रशिक्षण केन्द्रको टोलीलाई ३–० को सोझो सेटमा पराजित गर्याे। खेलमा एपीएफ हाबी देखिएपछि जाउलाखेलले दोहोरो अंकको स्कोर जोड्न सकेन। एपीएफले जावलाखेलविरुद्ध २४–४, २५–८ र २५–८ को स्कोरमा नतिजा निकाल्यो।
आजै भएको दोस्रो खेलमा अर्काे विभागीय टोली त्रिभुवन आर्मीले भरतपुर मेट्रो खेलकुदलाई ३–० को सोझो सेटमै पराजित गर्याे। त्रिभुवन आर्मीले भरतपुरविरुद्ध २५–८, २५–२० र २५–१० को नतिजा निकाल्यो।