अन्नपूर्ण आधार शिविरमा हिमपहिरो, दुई नेपालीसहित ६ जना बेपत्ता

काठमाडौं - अन्नपूर्ण आधार शिविरमा घुम्न गएका चार कोरियाली नागरिक र दुई नेपाली पथप्रदर्शकसहित ६ जना बेपत्ता भएका छन्। जिल्ला प्रहरी कार्यालय कास्कीका प्रहरी नायब उपरीक्षक दानबहादुर कार्कीका अनुसार अन्नपूर्ण आधारशिविर पुगेका नौ कोरियाली नागरिकको टिममध्ये पाँचसहित एक नेपालीलाई जीवितै उद्धार गरिएको छ। उद्धार गरिएका पाँचै जनालाई आधार शिविरबाट हिमालय भन्ने स्थानमा ल्याएर राखेको बताउँदै उनले मौसम सुधार हुनासाथ हेलिकप्टरमार्फत पोखरा ल्याइने जानकारी दिए।

अत्यधिक हिमपातसँगै आएको हिमपहिरोका कारण बाँकी चार जना कोरियन नागरिक र एक जना गाईड सम्पर्कविहीन भएको प्रहरीले जनाएको छ। मोबाइलको चार्ज सकिएर पनि सम्पर्क हुन नसकेको प्रहरी अनुमान छ। सो क्षेत्रका स्थानीय पर्यटन व्यवसायी र प्रहरीसहितको सात जनाको टोली अहिले उद्धारका लागि छुमरुङ पुगिसकेको प्रहरी नायब उपरीक्षक कार्कीले जानकारी दिए। टिममा अन्य नेपाली पनि हुनसक्ने अनुमान गरिएको छ।

अत्यधिक चिसोको कारण उद्धारमा कठिनाइ भइरहेको प्रहरीले बताएको छ।

थप विवरण आउन बाँकी छ ।