काठमाडौं - विश्वकै होचो व्यक्तिको कीर्तिमान बनाएका खगेन्द्र थापा मगरको निधन भएको छ। खगेन्द्रको शुक्रबार दिउँसो मणिपाल अस्पताल पोखरामा उपचारका क्रममा निधन भएको हो।
पोखराको सृजनाचोकमा बस्दै आएका बाग्लुङ धुल्लुवासकोट ६ घर भएका खगेन्द्रको स्वास्थ्यमा समस्या आएपछि बिहीबार अस्पतालको आईसीयूमा राखेर उपचार गरिएको थियो। निमोनियाका कारण उनको निधन भएको अस्पतालले जनाएको छ।
उनलाई दिउँसो ३ बजे मृत घोषणा गरिएको खगेन्द्र थापा मगर प्रतिष्ठानका अध्यक्ष मीनबहादुर रानाले बताए। खगेन्द्रमा यसअघि स्वासप्रश्वास, हमोग्लोबिनको कमी, ह्वाइट ब्लड सेल बढी हुने समस्या देखिएको थियो।
खगेन्द्रले २०६७ असोज २८ मा विश्वकै होचो व्यक्तिको रुपमा ‘गिनिज बुक अफ वर्ल्ड रेकर्ड्स’ मा नाम लेखाउन सफल भएका थिए। उनको उचाई ५७ सेन्टिमिटर ९२२।०४ इन्च० थियो। रूप बहादुर थापा मगर र धनमाया थापा मगरका छोराका रुपमा उनको जन्म २०४९ असोज १८ मा भएको थियो। खगेन्द्र जन्मदा उनको तौल जम्मा ६ सय ग्राम थियो। निधनअघि उनको तौल ५.५ केजी थियो।