बलियो मछिन्द्र शेर्पासँग पराजित

काठमाडौं - सहीद स्मारक ‘ए’डिभिजन लिगको बलियो टोली मछिन्द्र क्लबले पहिलो हार ब्यहोरेको छ। एन्फा कम्प्लेक्स सातदोबाटोमा सम्पन्न खेलमा मछिन्द्रलाई हिमालयन शेर्पाले पहिलो हार चखाएको हो।

खेलमा शेर्पाले पहिलो मिनेटमै अग्रता बनाएको थियो। मछिन्द्रका पिटर सेगुनले आत्मघाती गोल गर्न पुग्दा शेर्पाले अग्रता बनाएको थियो। त्यसपछि खेलको २० औं मिनेटमा विजय श्रेष्ठले हेडमार्फत गोल गर्दै टोलीलाई २-० को अग्रता दिलाए। निरज बस्नेतको फ्रि किकलाई विजयले गोलमा परिणत गरेका थिए।

पहिलो हाफको २० मिनेटमै २-० गोलले पछाडि परेपछि आक्रामक बनेको मछिन्द्रका दुई कडा प्रहार शेर्पाका गोलरक्षकले कठिन बचाउ गरे। पहिलो हाफमा आक्रामक बनेको मछिन्द्रले दोस्रो हाफमा पनि बल धेरै जसो आफ्नै पक्षमा राखेपनि गोल गर्नबाट भने चुक्दा पहिलो पराजय भोग्न बाध्य भयो भने शेर्पा पहिलो जित निकाल्न सफल भयो।

जितसँगै शेर्पाले ७ खेलमा ७ अंक जोडेको छ। शेर्पा लिगको नवौं स्थानमा उक्लिएको छ। मछिन्द्रले ७ खेलमा १३ अंक जोडेको छ।