शनिबार, चैत १५, २०७६

समाचार

‘लकडाउन’ को दोस्रो दिन जनकपुरमा थप कडाइ

‘लकडाउन’ को दोस्रो दिन जनकपुरमा थप कडाइ

जनकपुरधाम– प्रहरीले ‘लकडाउन’ को दोस्रो दिन जनकपुरमा कडाइ गरेको छ । पहिलो दिन मंगलबार कतिपयले ‘लकडाउन’ लाई अटेर गरेपछि दोस्रो दिन प्रहरीले कडाइ गरेको हो ।

‘लकडाउन’ प्रभावकारी बनाउन प्रहरीले कडाइ गरेपछि पहिलो दिनको तुलनमा न्यून सवारी साधन गुड्नुको साथै पैदल आवतजावत गर्नेहरु पनि सडकमा कम देखिएका छन् । ‘लकडाउन’ प्रभावकारी बनाउन धनुषाका प्रमुख जिल्ला अधिकारी, प्रहरी उपरीक्षकसहित उच्चपदस्थ सुरक्षा अधिकारीहरु स्वयं खटिएका थिए ।

यसैगरी ‘लकडाउन’ आफ्नै सुरक्षाको लागि रहेको भन्ने सन्देश प्रहरीले टोलटोल पुगेर माइकिङ गर्न लगाएको छ ।

यद्यपि कतिपयले भने ‘लकडाउन’ को उल्लंघन गरेको समेत पाइएको छ । अटेर गरेर ‘लकडाउन’ उल्लंघन गर्नेहरुमाथि प्रहरीले कतिपय स्थानमा लाठी चार्जसमेत गरेको छ । बिनाकाम घरबाट बाहिर निस्केर ‘लकडाउन’ उल्लंघन गर्नेहरुमाथि प्रहरीले लाठी चार्ज गरेको हो ।

२२ जना नियन्त्रणमा

‘लकडाउन’ उल्लंघन गर्ने २२ जनालाई प्रहरीले पक्राउ गरेको छ । उनीहरुलाई जनकपुरको विभिन्न स्थानबाट पक्राउ गरिएको जिल्ला प्रहरी कार्यालय धनुषाले जनाएको छ ।

यसैगरी ‘लकडाउन’ उल्लंघन गर्ने ७३ सवारी साधनसमेत प्रहरीले नियन्त्रणमा लिएको छ । प्रहरीले जनकपुरको विभिन्न स्थानबाट मोटरसाइकल, ई–रिक्सा, ट्रायक्टरसहितको सवारी साधन नियन्त्रणमा लिएको जिल्ला प्रहरी कार्यालय धनुषाका प्रवक्ता डीएसपी रामेश्वर कार्कीले जानकारी दिए । यसअघि प्रहरीले मंगलबार २६१ सवारी साधन नियन्त्रणमा लिएको थियो ।

यसैगरी प्रदेश २ को विभिन्न स्थानबाट प्रहरीले पाँच सयभन्दा बढी सवारी साधन नियन्त्रणमा लिएको आन्तरिक मामिला तथा कानुन मन्त्रालयले जनाएको छ । नियन्त्रणमा लिइएको सवारी साधनहरु ‘लकडाउन’ सकिएपछि मात्रै सम्बन्धित व्यक्तिहरुलाई फिर्ता गरिने प्रहरीले जनाएको छ ।

 

प्रतिक्रिया दिनुहोस्